All smiles at proud na gumapang sa stage si Jefferson Octaviano para samahan ang kanyang nag-iisang anak na babae na si Jennifer sa kindergarten moving-up ceremony nito sa Colongulo Elementary School sa Surallah, South Cotabato kamakailan.
May polio man si Octaviano, kailanman ay hindi ito umasa kahit kanino o namalimos para masuportahan ang pag-aaral ng kanyang 7-anyos na anak.
“Proud siya kasi nakapagtapos siya ng anak kahit kinder pa lang. Ang source of income niya pagugupit [barbero]…minsan nag ga-garden din siya [ng mga gulay] para pandagdag sa kita. Ayaw niya na manlimos,” ayon kay Dyna Jean Octaviano Terenia, pamangkin ni Octaviano, sa panayam ng 95.7 Brigada News FM.
Si Terenia ang nag-upload ng video sa Facebook na kasamang dumalo sa moving-up ceremony ng kanyang pinsan.
Pangako naman ni Octaviano, na iniwan na ng asawa, na gagawin niya ang lahat para makapagtapos ang anak hanggang kolehiyo.
Mensahe niya sa anak, “mag-aral ng mabuti Tin, kahit na gumagapang si papa mo, mag-aral ka lang ng mabuti para makapagtapos ka.”
