Pinarangalan ang mga siyudad ng Baguio sa probinsiya ng Benguet, Ilagan sa Isabela, at Tabuk sa Kalinga ng Clean Tourist City awards sa ginanap na Association of Southeast Asian Nations (ASEAN) Tourism Standard Awards sa Vientiane, Laos kamakailan.
Si Tourism Secretary Christina Garcia-Frasco ang nagbigay ng kani-kanilang plaque na tinanggap nina Baguio City tourism officer Alec Mapalo, acting Vice Mayor Lucretina Sarol ng Tabuk City at Ilagan City government officials.
“These are the areas where the flow of visitors and where cultural, natural and/or man-made attractions exist,” ang sinabi ng Department of Tourism ayon sa ulat ng Philippine Star.
Ito ang kauna-unahang pagkakataon na makakatanggap ng nasabing parangal ang Tabuk City. Pangatlong beses naman ito para sa Baguio.
Mayroong pitong criteria para makapasa ang isang syudad base na rin sa itinakda ng ASEAN Clean Tourist City Standard gaya ng environmental management, cleanliness, waste management, awareness-building about environmental protection and cleanliness, green spaces, health safety and urban safety and security at tourism infrastructure and facilities.
