May tsansang manalo ang Pilipinas sa World Travel Awards matapos makasungkit ng pitong awards sa katatapos lang na 31st annual World Travel Awards Asia and Oceana sa Parañaque City.
Uusad ang mga nanalo sa regional ceremonies sa Grand Final ng prestihiyosong World Travel Awards – (World categories) na gaganapin sa Portugal. Kinikilala ng international awards program na ito ang key sectors sa travel, tourism, at hospital industries sa buong mundo.
Napanalunan ng Pilipinas ang 2024 Asia’s leading beach, dive, at island destination. Nagwagi naman bilang specific destinations ang Intramuros. Ang Boracay naman ang nakakuha ng award bilang leading tourist attraction at luxury island destination, at leading wedding destination naman ang Cebu, ayon sa ulat ng ABS-CBN News.
Samantala, ang “Love the Philippines” campaign ng Department of Tourism ay nag wagi sa Asia’s leading marketing campaign. Hindi naman nagpahuli si Tourism Secretary Christina Garcia-Frasco dahil nakatanggap din siya ng transformational leader award para sa tourism governance.
“This is extremely important as a vote of confidence from the global travel community,” ani Frasco. Ito rin ang kauna-unahang pagkakataon na naging host ang Pilipinas ng World Travel Awards Asia and Oceana.
